كلام حق يراد به باطل #عباسية

حلوين في الجعجعة … وكأن مش من الجهل إن إحنا نضيع حقوقنا بسبب الهوهوة، وتشتيت الطلبات وإعطاء فرصه لولاد الأوساخ إنهم استحلوا دم الناس.. الناس الي منساقة ورا شعارات مش فمصلحة حد غير الي قايلها…. مازال سؤالي قائم ومحدش بيرد عليه .. استفدنا ايه من الاعتصام عند وزارة الدفاع؟ ما الداعي لنقل الاعتصام عند وزارة الدفاع؟ هل الي نقل الاعتصام من التحرير إلي وزارة الدفاع كانت القوة الثورية بأكملها؟ ولا إلي بدأها ناس ليهم مطالب من أهدافها إلغاء انتخابات الرئاسة لأن مرشحهم تم استبعاده ..وده مسجل ومعروف…قطعا الموضوع بعد التصعيد ورد فعل الفجرة البلطجيه الموضوع كبر و بقي أغلب الحركات السياسية منضمة للاعتصام.. بس ده بردوا في الأخر يصب في مصلحة المجلس العسكري الي محدش عنده شك إنه يريد تطويل الفترة الانتقالية.

واضحة وصريحة:

المجلس العسكري سبب أساسي في موت الناس.. بس ايه الجديد؟ هو انتم لسه واخدين بالكم؟ شهر واحد ونخلص منه.. مسلمش السلطه ننزل ناكله… ايه المشكله؟ ايه الجديد الي حصل من ساعه الاعتصام بتاع رئاسةالوزرا؟ ايه الي سخن الناس؟ المادة 28 ؟ من إمتي؟ ماإحنا من 3/ 2011 واحنا عارفين الموضوع….. أيه الي يستدعي النزول ؟ ولا دى حاجه مقصوده في إن كل ما البلد تهدأ والمرشحين يبدو يركزوا في حملاتهم يتم لهي الناس؟ حتي الأن أدي أسبوع طار من المرشحين من أصل 6 أسابيع لعرض مشاريعهم، مع العلم إن اختيار رئيس أياً كان نوعه, هو أول خطوة في رحيل المجلس العسكري…

واكيد عندما لا يأخذ المرشحين وقتهم في لم مأيديهم هيساعد علي تشتيت الأصوات و عدم حسم الانتخابات من أول جولة مما يطيل العمليه الانتخابية والتشتيت ده نفسه هيصب في مصلحة الفلول أكيد.

وبناء عليه أنا شايف إن الي كانوا موجودين “قبل المذبحة” لايمثلون غير الناس إلي مش عاجبها المرشحين الموجودين أو الي عاوزين واحد تم استبعاده… و ده مش في المصلحة العامة للوطن… مع تفهمي الكامل لحقوق التظاهر والإعتصام..

بس لما نتكلم عن اعتصام فئوي فده براحتكم.. إنما لما نبقي فقه صغيره ونعمل نفسنا نتكلم عشان الشعب كله ونطالب رحيل اللجنة العليا للانتخابات ده موضوع تاني وبيدبس ناس كتيير… كلام حق يراد به باطل..

دلوقتي الموضوع قلب من مطالبه لإلغاء مادة تفيد فئه معينه، للدفاع عن شرعيه الاعتصامات والدفاع عن حق دم شهداء مع إن إحنا كنا في غني عن ده كله.

المجلس العسكري هو بس السبب هو بس الي سيئ؟… مش حازم صلاح يعني…. نفس فكره عادل امام كده.. مش الي عاوزين يغيروا مواد في دستور هما نفسهم إلي أيدوه… مش إلتفاف علي إرادة الشعب ده؟ .. محمد أبو حامد والبرادعي لما قالوا الكلام ده كفروا دينهم … مش كده ولا ايه ؟ أبو حامد لما عمل اعتصام أمام المجلس عشان يأخد توقيعات الناس طلع دينه … معرفش ليه محللين الموضوع لنفسهم دلوقتي؟ ايه المكيال بتاعكم؟

كلام حق يراد به باطل