من خطابات المجلس العسكري علي مدار سنه تفهم ان التطويل في مصلحه كل من هو ضد التيار السياسي الاسلامي في مصر. لو تم تسليم السلطه من سنه لكان التيار السياسي الاسلامي استولي علي كل السلطات, واكبر دليل علي الكلام ده هو تغير راي الحريه و العداله و دخولهم بمرشح و ده كلامهم مش كلامي.. تطويل المرحله اعطي مساحه ووقت لتيارات مختلفه انها تعرض فكرها و محدش ينكر ان ده ساعد ناس كتير في اختيار مرشحهم و ايضا اوضح النوايا السيئه لاحزاب تعد من اقدم التيارات السياسيه في مصر…

في اعتقادي يحاول العسكري اظهار وساخه الاخوان او بمعني اصح يحاول توسيخ الجماعه الاسلاميه ككل .. واعقد العنف ده كله كان من المفروض يكون موجه للاسلاميين, ولكن الثوار بسذاجتهم و طبيعتهم الثوريه تصدروا المواجه دفاعا عن الحريات ككل.. واستغل الاسلميون السذاجه دي. ولم يعد لديهم حاجه لتصدر المواجهه, لان الثوار قايمين بالدور ده وزياده…

كان علي الثوار ان ينضموا للعسكري من البدايه ولو لفتره مؤقته.. في الاول و الاخر احنا كنا بنطاب بهذا التطويل عندما صوتنا بلا عشان نلحق نكون احذاب..
تركيزنا علي نهضه و انتشار تيارنا كان اولي من الدخول في نديه مع العسكري و كنا سبنا الاسلاميون لمواجه العسكري … كنا نقلب الايه يعني..

في اعتقادي يجب علي القوي اللبراليه و الثوريه ان تنسحب من الصفوف الاماميه للمواجهه و تركز علي تكوين كيان راسخ علي الارض من خلال خطه مداها متوسط بالكثير خمس سنين. وده الي بيعمله البرادعي اعتقد.

موالاه العسكري جزئيا او علي الاقل عدم الدخول معه في مصادمات سيكون في مصلحتنا , لان الشعب دلوقي عنده استعداد يتعلم اكتر ما نفسه يتفرج علي ناس بتنتحر عشان قضابا هما لسه مش مستوعبنها… ومنها قضايا حقوق الانسان و ما شبه. دي قضايا الرجل البسيط الي في الريف ميفهمهاش, ميفهمش يعني ايه ناس بقي لها 3 ايام واقفه امام محكمه بتقول لا للمحاكمات العسكريه .. ما هي كلها محاكم و خلاص.
احنا بنحارب لينا و لغيرنا و هنطلع من المولد بلا حمص, و ده حال اي تيار ثوري في العالم, تفقدوا كتب التاريخ, مش هتلاقوا ان في قوه ثوريه تمكنت من حكم بلد.

علينا ان نراجع اوراقنا و اعاده اختيار موالينا اذا كنا نحلم بالسلطه.

الاخوان فضلوا يحاربوا لوحدهم 79 سنه ولم يوصلوا للسلطه. بس عشان متواجدين علي الارض ولهم من يواليهم من الشعب وعشان لم يتصدموا مع العسكري عرفوا ياخذوا السلطه التشريعية.

حان وقت ان نلتفت لمصالحنا اذا كنا نحلم يوم بالسلطة.

وجهه نظر مختلفه لكن محتمله

امجد عثمان
06/05/2012